نتائج الانتقاء الاولي لمباراة التعليم دورة دجنبر 2023

 

الأغلبية باقي عندهم لُبس في مفهوم الديداكتيك، فهاد المنشور غنحاول نبسط إلى أقصى ما يمكن هاد المفهوم ونعطي أمثلة تبسيطية.

أولا خاص تعرف أن الديداكتيك هي طريقة تتوريك كيفاش تعامل مع المادة الدراسية باش تحقق الأهداف التربوية ديالها او من طبيعة الحال التلميذ إكتاسب "الكفايات" لي مدرجة فيها، فأي مادة كيفما كانت وكيفما كان السلك التدريسي، فالديداكتيك فيها 3 دالعناصر اساسية، "التخطيط، التدبير، التقويم،" أجي نشرحو كل وحدة بوحدها باش نفهمو كثر،:

نبداو بالتخطيط: هو ببساطة الإعداد القبلي لي تنديروه فالدار قبل منمشو لأي حصة دراسية، او التخطيط تينقسم ل3 الانواع، 

      النوع الاول قريب الأمد،  مثلا ملي غيكون عندي درس غدا خاصني نوجد ليه "الجذاذة البيداغوجية" اونجد "الأنشطة" لي غنخدم بهم او حتى الأسئلة لي غيخصني نطرحهم على "المتعلمين"، بمعنى أنه خصني نخطط لكلشي من ملي غندخل للقسم حتى نخرج منو.

     النوع الثاني: متوسط الأمد، هاد النوع تنديروه ملي تيكون داكشي لي غندير بعيد شوي، يعني على بعد اسبوعين او شهر، مثلا التخطيط للفرض المحروس إمتى خصني نديرو، أولا تصحيح سلسلة التمارين ....

النوع الثالث هو طويل الأمد، هاد النوع تيكون داكشي لي غنخطط ليه بعيد، او احسن مثال هو مثلا نخطط للسنة الدراسية كاملة كيفاش غدوز (الدروس الفروض الامتحانات الاشهادية ...).

العنصر الثاني هو التدبير، بكل بساطة هو تطبيق لدكشي لي خططت ليه، بمعنى نطبق داكشي لي خططت ليه في القسم اومعا المتعلمين دياولي، (نطرح الأسئلة لي قتارحتهم، اوندير الانشطة، نراقب الأجوبة، نوضهم إجاوبو على الأنشطة ...) اوهدا تيدخل في اطار تدبير المادة المـدَرَّسة،  اوكاينكين انواع اخرين ديال التدبير ندكرو منهم، 

          * تدبير جماعة القسم، هاد التدبير تيعني ببساطة ننظم المتعلمين في القسم، مثلا لي طوال إكونو اللور باش ميحجبوش الرؤية على هدوك لي قصار، الطاولات الأمامية إكونو فيهم لي عندهم مشكل في البصر، تنظيم على شكل مجموعات .....

        * تدبير فضاء القسم، هنا تنقصدو بيه واش الأجواء دالقسم مزيانة باش نبداو العملية التعليمية التعلمية ديالنا، مثلا واش الإضاءة في القسم كافية، واش السبورة تتبان لكلشي ...

العنصر الثالث هو التقويم، التقويم ببساطة هو التحقق من واش داكشي لي بغينا اوصلنا ليه اولا لا، مثلا ملي تنقري حصة كاملة اوبقات 10 دقايق باش تصوني، تنطرح عليهم أسئلة شفوية باش نعرف واش اكتاسبو الاهداف دالحصة اولا لا هدا تيتسمى التقويم، اوحتى هو فيه 3 دالانواع، 

    *تقويم تشخيصي، هاد التقويم هو غي تنعرف به واش المتعلمين عندهم الباكاج فدماغهم باش نبني معاهم معارف جداد اولا معندهمش، او تيكون فكل بداية سنة دراسية وكذلك فكل بداية حصة دراسية، إقدر إكون كتابي كيما فبداية السنة، اولا عبارة عن أسئلة شفوية كيما قبل بداية الحصة الدراسية، الهدف منو غنعرف فين عندهم ضعف فالمعارف باش نركز على هاد مكامن الضعف خلال بناء الدرس.

  *تقويم تكويني، هاد التقويم التكويني هو واحد التقويم تديرو فكل حصة باش تعرف واش المتعلمين غاديين معاك فالخط، اوتيكتاسبو المعارف او المهارات اولا لا، مثلا ملي تندير فقرة اوتنساليها، تنديرو معهم تمرين تطبيقي، هاد التمرين التطبيقي تيمثل تقويم تكويني لأنه غيكشف على النتيجة واش متبعين اوتيتعلمو اولا لا...

او فالاخير كاين * تقويم إجمالي،  هاد التقويم الإجمالي تيكون فمجموعة من الدروس، مثلا بحال الإمتحان المحلي دالسادس، او فالدروس كاملين، بحال الامتحان الوطني، او ممكن نعتابرو حتى الفروض المحروسة تقويم اجمالي لأنه تيشمل عدة دروس اوتيعطي الحصيلة ديال مدى التمكن من مجموعة من الكفايات ....

ملحوظة: مبغيتش ندخل فالديداكتيك الخاص، أي الخاص بكل مادة لأن الموضوع سيطول أكثر من اللازم.

# استخدمت لفظ "الكفايات" او هي مجموع المعارف او المهارات او القدرات لي خاص اكتاسبها المتعلم باش اقدر اوظفها في حل وضعية مشكلة.

# استخدمت غالبا لفظ المتعلم عوض التلميذ، لأن المقاربة الجديدة فالتدريس (المقاربة بالكفايات) غيرات الاسم من التلميذ ( التلميذ مجرد مستقبل للمعلومة وان الاستاذ هو الممتلك الوحيد للمعرفة وفق المقاربة القديمة) إلى المتعلم ( أي ان المتعلم هو الذي يبني معارفه ومهاراته بنفس والمدرس فقط مساعد وموجه).